Сoңғы қоңырау - 2019

Сыңғырла қоңырау сыңғырла,  аңсаймыз даусыңды сағына!

    Елбасы жариялаған  рухани жаңғыру бағдарламасын негізге ала отырып, ел ертеңі үшін жасалынған жобалармен оқушыларды хабардар етіп, орындай білу мектебімізде кеңінен жүргізілуде. Ауданымыздың белсенді азаматтарымен,  ардагер ұстаздармен, түлеп ұшқан түлектермен байланыс орнатып   олардың атқарған жұмыстары туралы  оқушылар арасында  түрлі бағытта іс-шаралар ұйымдастыру  жалғасын табуда.

    Биылғы   соңғы қоңырау мерекесі қарсаңында   білім берген ұясына тағзым етіп,             40 жылдық кездесуге келген түлектердің бас қосуы ерекше әсер қалдырды. Кездесуге келген аудандық емхананың  білікті дәрігері Р.Қырғызбаев, жеке кәсіпкерлер Пернебек Ерубаев, Жарылқасынова Алла Ермекбайқызы,  ұстаз Нұралбек Жұпарбеков, формацевт маман Лаззат Әбдікәримова, эксперт маман Толайым Шырынбекова т.б сынып жетекшілері  Тамара Әбдіқадірқызы Манаякованы ортаға алып қара шаңырақ М.Әуезов мектебіне деген сағынышын,  білім берген ұстаздарына, мектепке деген алғыстарын айтты. Ардагер ұстаздар Шарипа Баубекова, С.Шермағанбетова, Д.Мырзағараеваға құрметтерін білдірді.  

     Мектеп-гимназия директоры Р.Қамбарбаева оқу жылын қорытындылауда                     өз демеушілігімен мектеп үздіктері бастауыш сынып оқушысы Жансая Мұхтарқызын, орта буындардан Темірғали Нұрсұлтанды, жоғары буындардан  Аружан Ержанованы «Жылдың үздік оқушысы» сертификатымен марапаттаса, кездесуге келген түлектер атынан Цептер компаниясының Батыс Қазақстан бойынша басшысы, кәсіби бизнес тәлімгер  Түсіпбекова Шолпан Әліайдарқызы   осы оқушыларға 20000 теңгеден сый ұсынды.  Сонымен қатар әлеуметтік көмекті қажет ететін, жоғарғы оқу орнына түскен бітіруші бір түлектің стипендиямен қамтамасыз етілуін өз жауапкершіліктеріне алатындығын хабарлады.

     Біз мектеп ұжымы туған жеріміздің әрбір саласына еңбек сіңірген ардагерлерімізбен, жетістіктерімізбен, оқушыларымыздың шығармашылық жеңістерімен   мақтандық. Биылғы бітіруші түлектеріміздің  барлығы   өз  елінің адал патриоты,  белді маман иелері болуларына сенім артып  ақ жол тіледік.

              Директордың оқу ісі жөніндегі орынбасары  Бердісүгірова Мейраш Маманқызы